早幾日返左D新遊戲，而家想邀請大家上黎試玩～ 大家不需自行組團，我地會因應玩家人數同興趣編成不同小組試玩遊戲。當然如果本身就組夠一團人上黎玩我地都好歡迎啦！
🦉棋妙人生1月新game試玩會🎲
日期：2018年2月2日（星期五） 時間：晚上8時至凌晨12時 地點：旺角彌敦道570-572號基利商業大廈1103室 收費：每位60元，包罐裝/盒裝飲品x1
報名方法： 在此event page點擊「參加」，並以留言形式或PM形式寫低： 1. 聯絡人名稱 2. 參加人數 3. 想試玩既遊戲（1款 / 多款 / 冇所謂）
今次會試玩既遊戲有4款，以下係少少簡介：
🐻Baren Park 熊熊公園🌳 玩家人數：2-4 將砌圖元素加入左策略遊戲，玩家需要從公共資源區取得動物園既各種展區放係自己既動物園入面，但因為每種展區數量有限，手快有手慢冇，拎左返去之後又要就岩位砌到落自己個動物園先得，係一款玩法新鮮既輕型策略遊戲！
⚔️Meeple War 米寶戰爭⛰️ 玩家人數：2-4 雖然標題係戰爭，但其實哩款遊戲仲包含左探索、開發、建築等元素，幾位玩家由自己既部落出發，探索新既土地，建造新既建築物，並向對手引發戰爭，黎累積勇敢點數將自己既「米寶」送上「榮譽之山」，當榮譽之山放滿左自己既米寶就係獲勝既時候了！ 聽玩法同傳統既開發戰爭策略遊戲好類似，但哩款遊戲簡化左好多規則令遊戲可以係1小時左右玩完，變成左一款節奏輕快既策略遊戲！
🧚When I Dream 說夢人💤 玩家人數：4-10 睇玩家人數就知哩款係party game，每回合由一個玩家扮演睡眠者（發夢者），其他人抽身份分別扮演小仙子/惡靈，比提示發夢者估詞語卡（但要因應自己身份去引導/誤導發夢者），如果發夢者估岩就發夢者同仙子有分，估錯就惡靈有分，最後發夢者要將所有詞語組合成講返一個夢境出黎，講岩晒又有額外得分。 哩款party game玩法幾新穎，遊戲配件都好靚，係大人細路都岩玩既遊戲！
🏚️Mansions of Madness 瘋狂詭宅☠️ 玩家人數：1-5 由於再版關係，最新引起話題既哩款遊戲，係Call of Cthulhu（克蘇魯的呼喚）既桌遊版。玩家要進入一間古老大宅度探險，入面等待玩家既，係各種神怪、離奇既恐怖故事。哩一版仲要配合官方出既app黎玩，係遊戲劇本上多左非常多既不同組合，即使重覆遊玩都會遇上不同劇情，重玩度相當高！鍾意恐怖故事與角色扮演既你一定唔可以錯過！